Ц.Мягмаржав: Бүс нутгийн хөгжил, иргэдийн амьжиргаанд хувь нэмрээ оруулж байгаадаа баяртай байна

Аливаа улс орны хөгжил нь үндэсний үйлдвэрлэл, иргэдийн амьжиргаа нь тогтвортой ажлын байрнаас шалтгаалдаг.
Ажиллах хүчин, харилцаа холбоо, зам тээвэр гээд олон хүчин зүйлээс хамаараад бүтээн байгуулалтууд гол төлөв нийслэлд төвлөрдөг. Харин хөдөө орон нутагт томоохон бүтээн байгуулалтыг өрнүүлсэн “Улаанбаатар Гурил”-ын үйлдвэрийг энэ дугаартаа онцолон, гүйцэтгэх захирал Ц.Мягмаржавтай хүний нөөцийн бодлого, тэднийг тогтвор суурьшилтай ажиллахад нөлөөлөх хөшүүргийн тухай ярилцлаа.

-          Дархан-Уул аймагт нээгдсэн “Улаанбаатар Гурил”-ын үйлдвэрийн тухай танилцуулгаар яриагаа эхлэх үү?
-          Оны өмнөхөн үүд хаалгаа нээсэн манай үйлдвэр хоногт 300 тонн буудай тээрэмддэг, орчин үеийн технологийн шийдэл бүхий, улсдаа хамгийн томд тооцогдохоор хүчин чадалтай. Үйлдвэрийн бүтээн байгуулалтын ажлын хүрээнд 27000 тонны үр тариа хадгалах силос, оффисын барилга, агуулахын барилга барьж, ашиглалтанд оруулсан. Бүрэн автоматжсан, босоо технологитой манай үйлдвэрт бусадтай харьцуулахад цэвэр усыг 12 дахин бага зарцуулдаг, эрчим хүчийг 25% бага хэрэглэдэг, товчоор хэлэхэд байгаль орчин ээлтэй үйлдвэр. Энэ бүх бүтээн байгуулалтаас гадна бүс нутгийн хөгжилд, иргэдийн амьжиргаанд өөрсдийн гэсэн хувь нэмрээ оруулж, 100 гаруй ажлын байр бий болгосондоо бид баяртай байдаг. Өнгөрсөн долоо хоногт УИХ-ын дарга З.Энхболд Дархан-Уул аймагт хийсэн ажлын айлчлалынхаа үеэр манай үйлдвэрээр зочлон орон нутагт ажлын байр нэмэгдүүлсэнд талархалтай байгаагаа онцлолсон.

-          Ажилгүйдэл их байна гэж ярьдаг, гэтэл шаардлагатай ажлын байранд тохирох мэргэжилтнүүд олдохгүй байх тохиолдол элбэг. Энэ асуудлыг бүс нутагт хэрхэн шийдсэн бэ?

-          Өнөөдөр хөдөлмөрийн зах зээл дээр нарийн болон төрөлжсөн мэргэшлийн боловсон хүчин дутмаг байгаа. Үйлдвэрийнхээ хүний нөөцийг бүрдүүлэх гэж бид багагүй бэрхшээлтэй тулгарсан нь нууц биш. Бид голлох болон нарийн мэргэшил шаардагдах ажлын байрандаа Улаанбаатар хотоос тусгай гэрээтэйгээр зарим ажилтнуудыг Дархан- Уул аймагт ажиллуулж байна. Тэдэнтэй цалин, хөлснөөс гадна бусад хангамж, орон сууц гээд тусгай нөхцөл бүхий гэрээ хийн ажиллуулж, энэ асуудлаа эхний ээлжинд шийдсэн. Одоо орон нутгийн иргэдийг болон ажилтнуудыг мэргэшүүлэн сургах ажлууд шат дараатайгаар хийгдэж байна.

-          Монголбанк Орон сууцны ипотекийн  санхүүжилтийн журмыг гарган, арилжааны банкууд 8 хувийн хөнгөлөлттэй зээлийг олгоод эхэллээ. Ажилтнууддаа орон сууцтай болоход нь танай зүгээс ямар дэмжлэг үзүүлдэг вэ?

Бид шилдэг ажилтнуудынхаа байрны урьдчилгаа төлбөрийг нь бүрэн төлж, тэдэнтэй тогтвортой байдлын гэрээ хийн ажиллуулж байгаа. Төрийн үүрэг нь зөв бодлого журмаар бизнесийн салбараа, ард иргэдийнхээ амьдрал ахуйг дэмжихэд оршдог. Энэ журам иргэд төдийгүй байгууллага бүрийн хүсэн хүлээсэн зүйл болж чадсан. Төрөөс хэрэгжүүлж байгаа 8 хувийн зээл нь иргэдэд урьдчилгаа төлбөрөө хуримтлуулах, байр, орон сууцтай болох эрмэлзлэлийг бий болгох нь дамжиггүй.